Hai Haqeeqat,Gumaan Thori Hai
Ye Siyaasi Bayaan Thori Hai
Dar Sa Lagta Hai Kyun Nateje Se
Ishq Hai Imtehaan Thori Hai
Chor Kar Chal Diya Hume Yun Hi
Wo Koi Badgumaan Thori Hai
Teer Ki Ja Gulaab Kyun Na Milein
Zindagi Hai Kamaan Thori Hai
Koi Shikwa Karein To Kaise Karein
Apne Mun Mein Zubaan Thori Hai
Hum Ko Takta Hai Jis Haqarat Se
Tu Koi Asmaan Thori Hai
Hum Se Milne Ko Chal Ke Aye Magar
Is Qadar Meharbaan Thori Hai
Koi Basne Laga Hai Is Mein "Batool"
Dil Hai,Khali Makaan Thori Hai
No comments:
Post a Comment